OPLO : l’Ofici public que sosten la lenga occitana

Amb un perimètre d’accion que s’espandís del Massiu Central als Pirenèus, l’Ofici public de la lenga occitana (OPLO) sosten la promocion de l’occitan e favoriza l’ensenhament e la transmission de la lenga regionala.  

L’OPLO (Ofici public de la lenga occitana), establiment public creat efectivament en 2016, nasquèt d’una conviccion partejada entre l’Estat e las Regions. La de l’absoluda necessitat de sosténer e renfortir las politicas menadas en favor de la lenga occitana.

Aqueste gropament d’interès public (GIP) entre l’Estat e las Regions Novèla-Aquitània e Occitània, beneficia d’una delegacion, de mejans e de competéncias de sos sòcis.

  • Una accion espandida de l’Atlantic a la Mediterranèa

Dins lo perlongament de l’escrutin regional, la governança de l’Ofici public de la lenga occitana foguèt mesa en plaça. Mai que mai, son perimètre d’accion s’espandiguèt a 22 departaments, que cobrisson l’ensemble de la zòna occitanofòna de las regions Novèla-Aquitània e Occitània.

L’idèa de sosténer d’un biais concertat las politicas en favor de la lenga occitana figurava ja dins la carta de cooperacion interregionala e transfrontalièra de desvolopament de l’occitan, signada per sièis Regions, Aquitània, Auvèrnha,  Lengadòc-Rosselhon, Lemosin, Miègjorn-Pirenèus e Ròse-Alps, plan abans lo novèl decopatge regional. 

  • Un quadre per l’ensenhament de l’occitan

Tre sa creacion, l’OPLO metèt en òbra mantunas orientacions de trabalh dont lo sosten d’accions de promocion de l’occitan. Demest sas orientacions prioritàrias, la mesa en plaça d’un quadre nacional per  l’ensenhament de l’occitan. D’alhors, una convencion foguèt signada dins aqueste sens entre l’Ofici, lo Ministèri de l’Educacion Nacionala e las doas collectivitats (Regions Occitània e Novèla-Aquitània) lo 26 de genièr de 2017.

De declinasons academicas son estadas realizadas o son en cors d’elaboracion pels territòris concernits dins las acadèmias de Bordèu, Lemòtges, Montpelhièr, Peitieus e Tolosa.

Dins sas missions, l’OPLO velha tanben a sosténer d’accions de transmission e de socializacion de l’occitan tot en collaborant amb las associacions e autres actors engatjats per aquestas questions.

 

Ofici public de la lengua occitana

22, bd maréchal juin
31406 Tolosa cedex 9

Tel 05 82 60 02 80

Scroll to Top