En associacion amb l'ONISEP e lo CREO Lengadoc, l'Ofici public de la lenga occitana (OPLO) ven de publicar una plataforma novèla d'informacion suls trajèctes de formacion e los mercats professionals ligats a la lenga occitana.
Un portalh unic d'informacion
En 2015, la competéncia « orientacion » oguèt transferida per l’Estat a las Regions. Aquestas son d’ara enlà autonòmas per començar d’accions qu’a per mira d’informar los escolans suls trajèctes de formacion e los mercats professionals. L’ONISEP demòra una referéncia per l’informacion dels mestièrs.
Amb la publicatcion d’un site internet novèl « Occitan Estudis Mestièrs » (www.occitanetudesmetiers.com), l’OPLO a desirat prepausar una interfàcia unica d’informacion suls trajèctes ligats a la lenga occitana.
Aquela plataforma se posicionarà coma un portalh unic per informar lo grand public suls estudis superiors (bac+0 a bac+8), sus las perspectivas professionalas (mestièrs de comunicacion, de l’animacion e de l’accion sociala, de l’ensenhament e de la formacion, de la traduccion e de la documentacion) e suls biaisses per venir professor.a d’occitan (de nombroses pòstes son a provesir cada annada).
Una atencion prioritària : las liceanas e los liceans
La publicacion d’aquel site web s’acompanharà de diferentas accions de valorizacion. Los professors de licèu seràn egalament associats per tal de mobilizats los escolans occitanistas de Terminalas (mai o mens un milièr d’escolans apren l’occitan al licèu).
Aquel projècte es finançat per la Region Novèla-Aquitània, per la Region Occitània e pel Ministèri de l'Educacion nacionala dins l'encastre del Plan d'accion licèu per la lenga occitana de l'OPLO.
