Objectius e Missions

Desvolopar l’usatge e la transmission de l’occitan : la dobla mission de l’Ofici public de la lenga occitana.

Ciblar los joves per aumentar lo nombre de locutors actius e favorizar la transmission de la lenga occitana. Es l’objectiu global que s’es fixat l’Ofici public de la lenga occitana, OPLO.

Los joves son los locutors e portaires culturals de deman.

  • Una de las principalas missions de l’OPLO es de plan favorizar la practica de l’occitan per fin que la lenga regionala siá, a l’avenidor, mai e melhor parlada, e que s’installe dins un usatge regular.

  • D’efièit l’occitan, quitament s’es una lenga regionala que compta un nombre significatiu de locutors (1 milion environ), es pas totjorn plan vesible o audible.

Per favorizar sa locucion, l’Ofici public de la lenga occitana cibla particularament las joves generacions, e òbra per una politica publica lingüistica concertada, amb los diferents operators (collectivitats territorialas, establiments escolars, associacions…).

Las collectivitats territorialas, demultiplicatrises de las politicas publicas, son un dels primièrs relais dels projèctes locals. L’Ofici las acompanha en matèria de creacion d’una ofèrta d’ensenhament, de valorizacion e d’afichatge d’un patrimòni lingüistic.

Lo monde de l’ensenhament, qu’intègra la cellula familiala, la còla pedagogica, las rets associativas, pòrtan e completan lo desvolopament de l’ofèrta d’ensenhament de l’Educacion nacionala. Es l’autre domeni privilegiat.

Los tres axes de la progression de l’occitan :

  • La transmission

L’Ofici òbra per l’aumentacion de la transmission de la lenga occitana, per salvagardar sa compreneson, aital coma la diversitat lingüistica e culturala e l’estacament al territòri que representa.

  • L’usatge e la socializacion

Tot en sostenent la practica de la lenga occitana, l’Ofici desira contribuir al posicionament dels territòris, e a renfortir lo ligam generacional e la coësion sociala.

  • Valorizacion del plurilingüisme

La cellula familiala e l’escòla son los primièrs luòcs de contacte amb la lenga occitana. D’endreits privilegiats que favorizan lo plurilingüisme e lo multiculturalisme, tan coma las valors de tolerància e de dobertura al monde.

Las accions privilegiadas per l’Ofici

Totas las demarchas que contribuisson a desvolopar l’ensenhament, la transmission e la practica efectiva de la lenga occitana d’un biais repetitiu o recurrent, aital coma totas las accions (non ponctualas) que participan a sa valorizacion pòdon èsser sostengudas per l’Ofici.

Dins aquesta mission, l’Ofici s’apièja e sollicita totes los partenaris potencials : collectivitats localas, associacions, organismes d’ensenhament… dins la mira d’amplificar las accions menadas dins aquestes domenis.

 

Office public de la langue occitane

22, bd maréchal juin
31406 Toulouse cedex 9

Tel 05 82 60 02 80

Scroll to Top