Sul territòri de l’OPLO, son près de 540 000 locutors que fan viure cada jorn la lenga occitana, e es per eles que l’Ofici public de la lenga occitana a decidit de lançar, en partenariat amb lo Congrès Permanent de la Lenga Occitana e lo CIRDOC-Institut Occitan de Cultura, un estudi per la prefiguracion d’una aplicacion dedicada a la socializacion d’aquela lenga e cultura, dins tota sa diversitat.
Alara que la comunautat lingüistica occitana es l’una de las mai importantas en França metropolitana, los locutors an pas totjorn d’aisina adaptada a lors besonhs per (tornar)descobrir l’occitanitat de lor territòri, e crear de ligam al dintre d’aquel immense espaci : per exemple, dins qual magazin o servici public se pòt parlar occitan ? Ont se pòt trobar una escòla, un cors per adultes, o encara un concèrt a venir ? Ont se pòt rencontrar d’autres locutors prèstes a bigatar ?
Los objectius d’una tala aisina numerica pòdon èsser nombrós :
- aisir los locutors de l’occitan a practicar la lenga al diari en suscitant de situacions de discussion
- metre en lum la preséncia de la lenga dins l’environament immediat de l’usatgièr
- permetre als locutors de conéisser las estructuras e eveniments ligats a la lenga occitana
- far conéisser lo patrimòni material e immaterial ligat a la lenga e la cultura occitanas
- donar mai de visibilitat a las estructuras que òbran per la lenga e la cultura occitanas…
S’agìs de questionar los usatges numerics del public occitanophone, o interessat per la lenga e la cultura occitana, per tal de melhor ciblar las espèras que poirián dessenhar los contorns d’aquela novèla aisina per la socializacion de l’occitan!
A vosautres de jogar :
