L'Ofici public de la lenga occitana bota a disposicion dels 635 establiments de la zòna occitanofòna de Novèla-Aquitània e d'Occitània un escape game pedagogic a l'entorn de la lenga occitana.
Sensibilizar los escolans e las escolanas a lor « occitanitat» e a la diversitat lingüistica
L’Occitània Bòx es un jòc collaboratiu a tòca pedagogica : a l’entorn d’un scenari de sciéncia-ficcion, los escolans e las escolanas son convidats/adas a resòlvre diferentas enigmas. Un scenari de sciéncia-ficcion foguèt imaginat per sensibilizar los escolans e las escolanas a « l’occitanitat » de lor territòri e a l’importància de la diversitat lingüistica.
Lo sinopsis ? Un vaissèl espacial d’extraterrestres arriba al dessús del licèu e ensaja de dintrar en contacte amb un grop de licean.a.s. Lor mission : restablir lo dialògue ambe los Uman.a.s, dels quals parlan pas que la lenga que los abitant.a.s d’aicí lor ensenhèron fa mai d’un sègle pendent lor darrièr passatge sus Tèrra (l’occitan donc). Lor necessitat : preservar la diversitat lingüistica de l’Univèrs.
Lo jòc es dividit en doas partidas que se pòdon jogar de faiçon independenta, en 45 minutas caduna. Se pòt utilizar en classa (dins l’encastre d’un projècte pedagogic) o sul temps peri-escolar.
Acompanhar los/las ensenhaires/as d'occitan dins lo recrutament e la sensibilizacion dels/de las escolan.a.s
La question de las representacions de la lenga occitana es primordiala per assegurar sa transmission. Dempuèi l’an passat, l’opcion occitan foguèt revalorizada al bachelierat. Çaquelà, aumenta pas encara pro lo nombre de joves/as qu’aprenon l’occitan al licèu per limitar lo dangièr real que pesa sus la transmission de la lenga (totjorn considerada coma en « grand dangièr d’extinccion » per l’UNESCO).
En 2021, l’OPLO s’èra engatjat per un « plan d’accion licèu per la lenga occitana » a l’entorn de tres objectius : prepausar de ressorsas innovantas als escolans que seguisson ja un ensenhament en occitan, sensibilizar los autres als beneficis de son aprentissatge e valorizar las « bonas practicas » mesas en plaça dins los establiments.
Aquel projècte, que s’adreça en prioritat als/a las licean.a.s de segonda e als/a las collegian.a.s de 3en, s’intègra dins aquel plan d’accion.
Concretament, la bóstia de jòc serà mesa a disposicion dels/de las cap.a.s d’establiment e dels/de las ensenhaires/as tre aquela dintrada escolara. De luòcs de depaus permetràn de cobrir las acadèmias de Bordèu, Limòtges, Montpelhièr e Tolosa.
Pendent la remesa del jòc, l’OPLO metrà egalament a la disposicion dels establiments un lòt de comunicacion a utilizar dins l’establiment : afichas, fichas d’inscripcion, libret d’acompanhament, etc.
De notar que lo jòc es liurat amb una aplicacion dedicada que permet de validar las responsas e de progressar dins la resolucion de las enigmas.
L’ensemble de las informacions son a retrobar sul site de l’OPLO : www.ofici-occitan.eu.
