L’occitan uèi
Coma una lenga viu e evoluciona dins lo temps, los cercaires prenon a intervals regulars de « fotografias » de cada lenga parlada, per conéisser son estat de santat e veire coma evoluciona. Aquò pòrta un nom : una enquèsta « sociolingüistica ».
L’enquèsta sociolingüistica es un estudi que permet d’aportar de responsas a de questions que nos pausam dins lo cas de l’occitan :
- Quals son los que parlan la lenga occitana?
- Quantes son ?
- Perqué l’utilizan ?
- Coma l’an apresa ?
- Coma la transmeton e perqué ?
- Qué ne pensan los que la parlan pas ?
La darrièra enquèsta d’aquel tipe foguèt efectuada en 2020 sul territòri que cobrís l’Ofici, a saber las zònas occitanofònas de Novèla-Aquitània e d’Occitània. Foguèt alargada a la Val d’Aran (Espanha), ont es lenga cooficiala.
Vaqui los clichés d'aquèla fotografia d’ensemble (en francés) :
Çò que cal reténer :
7%
Se pòt avalor a 7% lo nombre de locutors* de l’occitan sus aqueles territòris. Aquel taus varia segon los territòris, de 2% a 22% dins las regions francesas, e fins a 62% a la Val d’Aran.
En tot, aquò representa mai o mens 542 000 personas (sens comptar los locutors que vivon sus la rèsta dels territòris de lenga occitana: Auvèrnhe, Droma, Ardecha, Provença e vals occitanas del Piemont italian.
*personas que declaran parlar occitan sens dificultat o sufisentament per téner una convèrsa simpla.
Perfil del locutor tipe : un òme atjat vivent en mitan rural
Una fòrça larga adesion de la populacion
92% s’exprimisson en favor de manténer o desvolopar de la lenga occitana.
Prèp de 8 personas enquestadas de 10 se dison favorablas a d’accions publicas.
D'importantas espèras per l'avenidor
Un pauc mai de 8 personas de 10 son favorablas al desvolopament d’una ofèrta d’ensenhament de l’occitan, de la mairala al licèu.
41% son favorablas a un aprendissatge de l’occitan tot lo long de l’escolaritat, de la mairala a l’universitat.
La revitalizacion de la lenga passa enfin per sa visibilitat dins tots los sectors de la vida publica, e nòstres conciutadans i son largament favorables :
Dos tèrces son pel renfortiment de la preséncia de l’occitan dins las mèdias (television, premsa, ràdio, Internet).
7 personas enquestadas de 10 son puslèu favorablas al desvolopament de practicas bilingas dins los luòcs publics tals comala signaletica, las anóncias visualas e sonòras dins los transpòrts en comun…
87% de las personas enquestadas se dison puslèu favorablas a la proposicion de resforçar e de comunicar sus la practica culturala occitana
Ne volètz saber mai sus la situacion de l'occitan uèi ?
Podètz tanben tornar descobrir la restitucion d’aqueles resultats en clicant aquí.
Aquèla enquèsta foguèt cofinançada a nautor de 65% pel Fons europèu de desvolopament regional (FEDER) via lo Programa Interreg V-A Espanha-França-Andòrra (POCTEFA 2014-2020), dins l’encastre del projècte IRAKASLEGIAK. L’objectiu del POCTEFA es de reforçar l’integracion economica e sociala de l’espaci frontalièr Espanha-França-Andòrra. Son ajuda es concentrada sul desvolopament d’activitats economicas, socialas e environamentalas transfrontalièras pel biais d’estrategias conjuntas que favorizan lo desvolopament durable del territòri.
Office public de la langue occitane
22 boulevard du Maréchal Juin
31406 Toulouse cedex 9
05 31 61 80 50
contact@ofici-occitan.eu
