Dins l'encastre de son Plan d'accion licèu, l'Ofici public de la lenga occitana ofrís un magazine en occitan als licean.a.s de la region
Un present de dintrada per totes los liceans qu’aprenon l'occitan
En aquela debuta d’annada escolara, los professors d’occitan en licèu trobèron dins lor casièr un magazine tot en occitan a destinacion de lors escolans. Aquel magazine, es Lo Diari dins una edicion especiala revisitada pels licean.a.s que tracta exclusivament de tematicas qu’interèssan aquel public. Es ofèrt per l’Ofici public de la lenga occitana (OPLO) a totes los escolans occitanistas de las Regions Novèla Aquitània e Occitània. Es lo premièr còp qu’aquela operacion es desplegada en direccion dels 64 establiments que prepausan l’opcion occitan.
A travèrs aquela distribucion, l’OPLO cerca a diversificar las ressorsas d’utilizar en classa e a respondre atal a un besonh exprimit pels ensenhaires.
Premièr « fòra seria » pel Diari : magazine cultural tot en occitan
Lo Diari es un magazine bimestral cultural d’un 40at de paginas, tot en occitan. Es editat dempuèi 2008 per l’IEO OPM e seguit per una comunautat de mai de 2500 lectors sus tot lo territòri occitanofòne. Aquel premièr fòra seria tracta de subjèctes precises, que parlan als joves, coma los mangas o los jòcs vidèo, las aplis, las serias de veire en streaming, la musica… Coma los autres numèros, prepausa un esclairatge modèrne sus l’actualitat, en tot portar una atencion particulara a la creativitat e a la qualitat grafica dels contenguts.
« Tota l’equipa del Diari a mes son saber-far al servici d’aquel projècte afiscant : evolucions de maqueta, contenguts novèls, contributors novèls s, rubricas novèlas, glossaris novèls…» explica Danís Chapduelh, per Lo Diari. « Mercés a l’OPLO, aqueste Diari especial es gratuit, aital cadun.a o pòt consultar en linha, o partejar, o difusar… Esperam que los joves lectors prendràn tant de plaser a o fulhetar que nosautres a o concebre ! ».
Una operacion dins l'encastre d’un Plan d’accion licèu
Alara que lo ministèri de l’Educacion nacionala prepara la revalorizacion de l’opcion occitan al bac tre 2022 (los efectius demesiguèron de -40% respècte a 2016 en seguida de la reforma del bac), aquela operacion es una de las premièras del « Plan d’accion licèu » votat per l’OPLO per encoratjar l’aprendissatge de l’occitan al licèu.
Vist lo fòrça bon acuèlh reservat a aquel Diari, tant per las equipas pedagogicas que pels escolans, l’operacion poiriá èsser reconducha a cada dintrada escolara.
Information mai :
gael.tabarly@ofici-occitan.eu / 07 56 27 27 07
