L’OPLO presenta la 3na ficha de son kit a destinacion dels actors de las collectivitats localas, que concernís l’acompanhament a l’obertura de las calandretas.
Las calandretas, mai de 40 ans d'ensenhament immersiu laïc e associatiu
Las calandretas son d’escòlas immersivas (l’ensenhament es desplegat quasi-integralament en lenga occitana) dins una estructura de tip lei 1901 que foncionan gràcias a l’implicacion dels parents e al sosten financièr d’aquestes, dels benevòls e de d’unas collectivitats, en acòrdi amb las autoritats academicas. Las escòlas calandretas prepausan una pedagogia originala, inspirada de la pedagogia Freinet.
Son d’escòlas qu’an un estatut privat mas jos contracte amb l’Estat, que recruta el meteis los ensenhaires per un concors dedicat e que los remunèra.
La coordinacion pedagogica es pilotada a l’escala interacademica per la Confederacion de las calandretas.
Aqueles establiments pòdon concernir tot nivèl de la mairala al licèu.
Las calandretas existisson dempuèi 1979. En 2022, se comptava 3981 mainatges escolarizats, 65 escòlas, 4 collègis, 1 licèu, 19 departaments, 225 ensenhants e 350 emplegats non-ensenhants.
Las collectivitats pòdon acompanhar de projèctes
L’obertura d’una calandreta es un projècte que pren de temps. L’obertura de l’escòla exigís l’acòrdi dels servicis academics. L’agradança es pas sistematica e s’establís al cas per cas. Es un projècte associatiu, portat per d’actors del territòri, educatiu, sostengut per de parents desiroses d’i inscriure lors mainatges, mas tanben de territòri. Lo sosten dels/de las elegit/ida.s. local.as es indispensable per permetre als projèctes d’espelir. Los/las elegit.ida.s se pòdon apujar sus las convencions academicas, lo sosten de la Confederacion de las calandretas e de l’OPLO.
De notar qu’aquela ficha serà integrada dins un « kit collectivitats » en cors d’elaboracion. Aquel kit serà utilizat pendent los diferents rencontres amb los/las elegit.ida.s, prepausat en depaus a mantun endrech estrategic del territòri interregional e enviat, sus demanda, als actors e militant.as de terren.
