L'OPLO lança l'edicion d'un kit a destinacion dels actors de las collectivitats localas. La primièra ficha d'aquel kit tòca l'acompanhament a l'obertura de cursus bilingüe.
Incitar las collectivitats a s'engatjar per l'obertura de cursus bilingües
Amb 80% dels/de las abitant.as de Novèla Aquitània e d’Occitània favorables/as al desvolopament d’una ofèrta d’ensenhament en occitan de la mairala al licèu (Enquèsta sociolingüistica sus las representacions e los usatges de la lenga occitana de 2020), de mai en mai d’iniciativas localas espelisson. Aquelas iniciativas qu’an per mira de possar los servicis del ministèri de l’Educacion nacionala a dobrir de cursus bilingües sul territòri son lo mai sovent portadas per de collectivitats (de comunas principalament, mas egalament de las comunautats de comunas e dels departaments).
La complexitat e la pesantor de las proceduras an pasmens de còps rason d’aquelas iniciativas. Es per los acompanhar que l’OPLO a causit de publicar de fichas practicas presentant totas una seria d’elements tecnics : sintèsi del quadre legal, valorizacion dels beneficis, formalizacion de las modalitats practicas, detalh de l’impacte budgetari per la collectivitat, compilacion dels espleches e ressorsas, testimoniatges e mesa en relacion amb de/de las elegits/idas, tecnician.as, parents d’escolans…
Acompanhar las dinamicas territorialas
Una primièra ficha « Dobrir un cursus bilingüe » ven donc d’èsser publicada (en francés) per l’OPLO. S’adreça en prioritat als/a las elegits/idas e tecnician.as de las collectivitats. D’autras fichas son en cors d’edicion e seràn publicadas tot lo long de l’estiu, amb l’objectiu de presentar un kit complèt a la dintrada de setembre de 2023.
Caduna de las fichas es bastida en ligam amb los actors concernits (OPLO, Òc-Bi, Regions pels cursus bilingües per exemples).
Los kits complèts seràn utilizats pendent los diferents rencontres amb los elegits. Seràn egalament prepausats en depaus a mantun endrech estrategic del territòri interregional e seràn enviats, sus demanda, als actors e militants de terren.
