Jornada occitana de liason collegi-liceu Peirigòrd-Lemosin 2019 : « De la collecta occitana a la creacion contemporanea »

A l’iniciativa de l’Ofici public de la lenga occitana (OPLO) e en partenariat emb lo conselh departementau de la Dordonha e de l’Agéncia culturala departementala de la Dordonha, qu’es lo 11 d’octobre 2019 que se desbotjará per la tresena annada consecutiva ‘na jornada occitana de liason collegi-liceu a Perigüers. Quel eveniment ‘massará mai de 240 escolans e liceans daus departaments de la Dordonha, de la Corrèsa e de la Nauta-Viena.

L’Office public de la lenga occitana organiza un còp a l’an de las jornadas occitanas de liason, en partenariat emb los departements concernits. L’objectiu de quelas manifestacions ‘massant daus escolans e liceans beneficiant d’un ensenhament de l’occitan es d’assolidar son aprendissatge en delai dau collegi et de renforçar aitau la continuitat pedagogica trusc’au liceu. Quelas jornadas visan tanben a far descobrir l’occitan per ‘na apròcha actuala e ludica.

« De la collecta occitana a la creacion contemporanea » es la tematica retenguda per l’edicion 2019 organizada peus elevas dau Peirigòrd-Lemosin. Pendent tota la jornada, los elevas banturlarán entre diferents ‘taliers tematics, acompanhats d’intervenents especializats :

  • Musica e practica instrumentala : « Lo collectatge en-chantat per la practica instrumentala »
  • Chant : « Collectatges en scena, a la descuberta d’un patrimòni orau chantat »
  • Arts visuaus e conte : « De l’oralitat dau conte a la banda dessenhada dau quotidian »
  • Descuberta d’« Hortus, vergier trobador » e sensibilisacion a la botanica :  « Legida dau vergier medievau a l’esgard de la poesia daus trobadors ».

Assistirán tanben a l’espectacle « Ieu parli pas occitan en public » per la Companhiá Lilô au Palatz, e participarán a un bal a l’entorn de las danças tradicionalas.

Per quela accion de sensibilisacion, l’Ofici public de la lenga occitana e lo departament de la Dordonha entenden promòure aitau la transmission e l’usatge de l’occitan au prèp dau jòune public.

 

Quela jornada será per alhors l’enchaison per l’Ofici public de la lenga occitana e lo Conselh departementau de signar la Convencion 2019-2022 relativa a la cooperacion e a la complementaritat en matièra de politica lingüistica per fin de persegre lors accions comunas e de botar en plaça de nuòvas sinergias.

La signatura de la convencion se tendrá dins los vergiers de l’Espaci culturau François Mitterrand a 13o30 en preséncia de Charline CLAVEAU-ABBADIE (Presidenta de l’Ofici public de la lenga occitana, conselhiera regionala delegada a las lengas e culturas regionalas) e Régine ANGLARD (Vice-presidenta a la Cultura et la Lenga occitana dau Conselh departementau de la Dordonha, Presidenta de l’Agéncia culturala departementala Dordonha- Peirigòrd).

Ofici public de la lengua occitana

22, bd Maréchal Juin
31406 Tolosa cedex 9

Tel 05 82 60 02 80

Scroll to Top