Integrar l’occitan dins l’ofèrta culturala
Elegits/idas, tecnician.a.s d'una collectivitat, desiratz integrar l'occitan dins la programacion culturala de vòstra collectivitat o de vòstre establiment ? L'OPLO vos acompanha !
Qu’es aquò ?
De nombrosas comunas, EPCI o pargues naturals regionals intègran d’ara enlà la lenga e la cultura occitanas dins l’ofèrta culturala de lor territòri, prepausant atal al public de las creacions, activitats o eveniments metent a l’onor lo patrimòni local, material coma immaterial, e una cultura occitana viva.
Aquela demarcha pòt concernir la programacion d’un establiment o d’un festenal, d’associacions amb d’artistas o de las creatrises e creators, o encara lo sosten a de projèctes d’educacion artistica e de mediacion.
Perqué ?
- Promòure la pluralitat de las expressions culturalas e facilitar lo viure amassa a l’escala del territòri ;
- Prene en compte las especificitats istoricas e patrimonialas de son territòri, espleches de valorizacion e de diferenciacion dels territòris, e los promòure sustot al près dels sectors economics e toristics ;
- Sostenir las scènas artisticas e literàrias localas e favorizar l’aviada de practicas culturalas en occitan, accessiblas a tot.a.s, occitanofòn.a.s o non.
Cossi ?
Lo CIRDÒC – Institut occitan de cultura acompanha las collectivitats e lors establiments dins lor projècte de creacion o d’aprigondiment d’una politica d’ofèrta culturala inclusent e valorizant l’occitan.
Sa politica de cooperacion prepausa atal una ofèrta graduala, anant del conselh e del prèst de supòrts e dispositius de mediacion, fins a la coproduccion evenimenciala per las associacions en mai granda amplor, mobilizant los mejans umans e financièrs de l’establiment.
Aquel acompanhament se debana segon lo modèl seguent :
- ETAPA 1 – Conselh a la programacion d’eveniments e d’accions territorialas : mesa a disposicion de supòrts e de ressorsas (Catalòga Tè!, annuari de la creacion : Fabrica.occitanica.eu…), conselhs e assisténcia a l’elaboracion de la programacion, ajuda a l’estructuracion de l’eveniment e a sa perennizacion ;
- ETAPA 2 – Mesa a disposicion de supòrts de mediacion e espleches de difusion en direccion dels publics-ciblas, se s’escai, coproduccion de supòrts o d’accions evenimencialas o educativas ;
- ETAPA 3 – Formacion de professional.a.s e d’elegit.e.s a l’accion culturala en domeni occitan ;
- ETAPA 4 – Ajuda a la promocion e al desvolopament dels publics.
Pour vous ajudar
Servici d’informacion, expertesa documentària, acompanhament de projèctes, accions de formacion, prèst d’exposicions, prèst de salas e de supòrts de mediacion :
- Centre internacional de recèrca e de documentacion occitanas (CIRDÒC – Institut cultural de cultura)
www.oc-cultura.eu / secretariat@oc-cultura.eu
Desvolopament de l’ofèrta d’ensenhament, mesa en relacion amb los operators de terren, espleches de promocion e de valorizacion, ressorsas a destinacion dels elegit/ida.s e dels agents de las collectivitats :
- Ofici public de la lenga occitana (OPLO)
www.ofici-occitan.eu / contact@ofici-occitan.eu
Una question ? Contactatz l'OPLO !
Ne saber + suls projèctes relatius a la lenga occitana :
Office public de la langue occitane
22 boulevard du Maréchal Juin
31406 Toulouse cedex 9
05 31 61 80 50
contact@ofici-occitan.eu
