Focus sus las decisions màgers presas per l’Ofici public de la lenga occitana dens l’encastre de la sona darrèira Amassada generala

Amassada generala deu 10 d’abriu 2019

  • Vòte deu purmèir tròç de las ajudas 2019 aus operators

Dens l’encastre de la sona Amassada generala deu 10 d’abriu passat, l’Ofici public votèt una purmèira andada de subvencions de cap aus operators, en las quaus retrobam la consolidacion de la pujada hèita en favor de la federacion regionala de las Calandretas d’Aquitània (+ 10 000 €, sia un montant totau de 210 000 €). Çò de nau, l’associacion Terra d’Òc (associacion de l’Institut d’Estudis Occitans de la Charenta occitana) hèi l’objècte d’un accompanhament capvath l’Ofici per sas activitats de cors per adultes.

  • Un quadre de cooperacion entre l’OPLO e los Departaments

La convencion 2019-2022 relativa a la cooperacion e a la complementaritat entre lo Departament de Dordonha e l’Ofici public de la lenga occitana en matèira de politica linguistica estut votada l’unanimitat per l’amassada departamentala e l’AG de l’OPLO. Aqueth tèxte pausa lo quadre de tribalh qui va guavidar l’Ofici dens son anar de contractualisacion damb los Departaments de Novèla-Aquitània e d’Occitania volontaris sus la question de la lenga occitana. Aquò se concretiza notadament per una mobilisacion deus Departaments au ras de l’OPLO sus la prefiguracion de l’enquèsta sociolinguistica occitana venenta o enquèra per la realisacion de campanhas de comunicacion comunas territorializadas, en particular dens lo domèni de l’ensenhament.

  • Una mocion portada pr’aus elegits regionaus a l’atencion deu President de la Republica per l’alertar sus la situacion de l’occitan

Las Regions Novèla-Aquitània e Occitania, representadas per Charline Claveau-Abbadie e Patric Roux, respectivament President e 1èir Vice-President de l’Ofici public de la lenga occitana, desirèren sasir lo President de la Republica, lo Purmèir Ministre e lo Legislator au subjècte de las dificultats rescontradas uèi per la lenga occitana. Se disen particularament tafurats per las consequéncias de la reforma deu licèu sus l’ensenhament de l’occitan, dorsèir qu’evolua pas pr’au moment a maugrat de la mobilisacion de l’OPLO e de las Regions per alertar lo Ministre de l’Educacion nacionala dempui mantuns mes jà. Es enfin question deu flaquèir deus mejans autrejats per l’Estat a las associacions e a l’OPLO. A n’aqueth perpaus, la participacion de l’Estat a l’OPLO representa pas que 3% deu son budgèt, quan la mejana se situís entre 20 et 30% pr’aus utís equivalents en França.

Aquera mocion estut adoptada per l’amassada generala de l’OPLO, 5 votz per las Regions Novèla-Aquitània e Occitania e una abstencion de l’Estat (mocion de telecargar).

Ofici public de la lengua occitana

22, bd maréchal juin
31406 Tolosa cedex 9

Tel 05 82 60 02 80

Scroll to Top