L'Ofici public de la lenga occitana, gropament associant l'Estat (Ministèri de l'Educacion nacionala e Ministèri de la Cultura), la Region Novèla-Aquitània e la Region Occitània, ven de difusar un document d'informacion a las 200 escòlas bilingüas de Novèla-Aquitània e d’Occitània. Los parents d'escolans e los actors del monde educatiu interessats per l’ensenhament bilingüe poiràn dintrar en contacte amb l’OPLO per d’entrensenhas mai a n’aquel subjècte.
Informar sus los beneficis del bilingüisme aboriu
Dempuèi mantunas annadas, lo Ministèri de l’Educacion nacionala reconeis oficialament que l’ensenhament bilingüe francés-occitan «contribuís al desvolopament de las capacitats intellectualas, lingüisticas e culturalas dels escolans » (Circulara del 13/04/2017, Ministèri de l’Educacion nacionala). Aquela reconeissença es egalament partejada per la majoritat dels parents d’escolans de las Regions Novèla-Aquitània e Occitània:
- En 2020, 81% dels abitants se declaravan favorables a un aprendissatge de l’occitan a l’escòla* ;
- 14% de lors dròlles aviá ja beneficiat d’un ensenhament de/en occitan*.
Causir uèi l’ensenhament bilingüe per son dròlle, es s’engatjar dins un projècte educatiu als beneficis atestats : poder escambiar amb los ensenhaires suls enjòcs d’una educacion plurilingüa precòça amb de beneficis son confirmats per las neurosciéncias.
Causir l’ensenhament bilingüe per son dròlle, es li dobrir lo camp dels possibles : a travès un environament cultural portaire de sens, en transmetent la lenga e la cultura de son territòri e en l’expausant a una alternativa al monolinguisme quand 66% de la populacion mondiala es bilingua.
Causir l’ensenhament bilingüe per son enfant, es li permetre de melhor mestrejar sas lengas : vesin del catalan, de l’espanhòl o de l’italian, l’occitan es una lenga a justa distància del francés que permet dels anar-retorns per apréner a legir, per comparar e compréner lo foncionament de las doas lengas e preparar l’aprendissatge d’autras lengas.
Causir l’ensenhament bilingüe per son enfant, es portar l’alteritat en se : aprener a combinar diferents punts de vista, causir amb mai d’aise son mòde d’expression, melhor focalizar son atencion, s’adaptar al cambiament, espandir sa curiositat e sa tolerància dins l’encastre d’un cursus que va de l’escòla mairala fins a l’universitat.
Un utís d’informacion a vocacion inter-academica
L’Ofici ven de publicar una plaqueta d’informacion « Aprener l’occitan a l’escòla primària ». Aquela plaqueta es estada elaborada dins l’encastre de la convencion de partenariat Estat-Regions-OPLO del 26 de 2017 per l’ensenhament de l’occitan. Sa realizacion preten respondre als besonhs identificats sul terrenc. A fait l’objècte d’una larga consulta per poder prepausar quicòm adaptat al primari, ont los enjòcs son los mai fòrts.
S’agís del primièr document a vocacion interacademica, desplegat a l’adrèça de totes los establiments del 1r gra, publics o associatius, de las acadèmias de Bordèu, Limòtges, Montpelhièr e Tolosa.
Un interlocutor per orientar las familhas
En aquel periòde de fin d’annada escolara, l’OPLO se prepausa de far lo ligam entre los parents d’escolans interessats pel bilingüisme precòç e los diferents actors de l’ensenhament (establiments, ensenhants, associatius, collectivitats).
Fins a la dintrada escolara, l’OPLO dobrís una « pòrta de dintrada » de cap a las familhas :
- Page dedicada sul sit internet + formulari de demanda d’informacion : https://www.ofici-occitan.eu/oc/aprene-loccitan/loccitan-a-lescola/
- Cartografia precisa dels establiments prepausant un ensenhament bilingüe: https://www.ofici-occitan.eu/oc/carta-de-lensenhament-de-loccitan/
Sètz un actor de l’ensenhament en occitan e desiratz poder dispausar d’un estòc de desplegants «L’ensenhament bilingue francés-occitan a l’escòla » ?
- Raprochatz-vos de nòstres partenàris : conselhièrs pedagogics departamentals, Òc-Bi, Cap’Òc o federacion regionala Calandretas ;
- Nos podètz demandar lo mandadis de documents a partir d’aquesta pagina : https://www.ofici-occitan.eu/oc/voletz-ensenhar-loccitan/demandar-lo-mandadis-de-documents/
