Una primiera per lu Lemosin
Lo Diplòma de competencia en lenga (DCL) occitan es un diplòma d’Estat. S’agís d’una certificacion professionala que permet a tot locutor de l’occitan, quau que siá son nivèu, de far certificar sas competéncias en lenga occitana, confòrmament au quadre europèu comun de referéncia per las lengas (CECRL). Creat en 2010, daus centres d’examen existen per lu moment a Bordèu, Tolosa, Montpelhier e Niça. Après mai d’un mes de negociacions entre l’Ofici public de la linga occitana e lu Rectorat de Limòtge, un centre d’examen dau DCL occitan va drubir à Limòtges, jos reserva d’un minimum de 8 inscriuts. Entau poirà acculhir los candidats de dialecte lemosin. Las inscripcions seràn possiblas nonmàs fins au 26 de març, mentre que las espròvas se debanaràn lu 26 de mai qu’arriba (https://dcl.education.gouv.fr/inscription/)
Una ajuda de l’OPLO per respondre a una demanda daus actors economics, sociaus e culturaus
Mentre que 43% de la populacion de las regions Novèla-Aquitània e Occitània declara compréner mai o mens plan la lenga occitana*, los usatges sociaus e professionaus de la lenga demòran una realitat quotidiana. Dempuèi mai d’annadas, l’Ofici public de la linga occitana (OPLO) acompanha las organizacions economicas, socialas e culturalas dins una demarcha de certificacion de las competencias comunicacionala en occitan de lors actors.
Concretament, l’Ofici pren en charja 80 % daus fraisses d’inscripcion a l’examen dau DCL. Lo dispositiu concernís aitant plan los/las salariats/-adas, coma los/las demandaires/-ras d’emplec, los/las estudiant.a.s, los/las particulars/-ras, los/las estagiari.a.s en formacion professionala que los/las titular.a.s en formacion continüa, a partir dau moment que s’inscrivan dins ‘quela demarcha professionala.
Lo succès dau dispositiu
Dempuèi 10 ans, mai d’una detzena d’individús a entau vist sas competencias certificadas en occitan. « Lo dispositiu s’adreça principalament aus professionaus qu’an per utis quotidian la linga occitana dins diferents domenis professionaus taus coma lo sector associatiu (assistents administratius, secretaris, charjats de comunicacion…), de l’ensenhament (ensenhants, futurs ensenhants, auxiliars de vita escolara, assistents mairaus…) o enquera dau torisme (guidas, mediadors…) o de l’agricultura (viticultors, legumaires…) », explica Charline CLAVEAU, presidenta de l’Ofici public de la linga occitana.
E mai se lo nombre de beneficiaris a conegut una leugièra baissa en 2020, en rason de la supression de mai d’una session programada pendent la crisi sanitària de la prima, aquela mesma crisi podriá d’aura en lai restablir la tendencia a la nauça : « La situacion que vivèm dempuèi mai d’una annada a accelerat la presa de consciéncia collectiva daus enjòcs ligats a la relocalizacion de las activitats umanas. Per daus entrepreneires, la mobilizacion de la linga occitana, perque veïcula ‘quelas valors de proximitat, d’autenticitat e de durabilitat, es una faiçon de proclamar son estachament ad un territòri, tot en se dobrissent a l’autre e en se virant chap a deman », contunhua Charline CLAVEAU. « Per los salariats, tribalhar en occitan, es tanben la garantida d’un emplec non-deslocalisable, non-robotisable ni informatisable ».
Informacions mai : https://www.ofici-occitan.eu/oc/e-vosautres-as-avetz-vostre-dcl-occitan-dubertura-de-las-inscripcions-2021/
*Proporcion d’occitanofònes e d’occitano-impregnats (sorça : enquèsta sociolingüistica 2020)
