Correspondéncia #4 – EDITO

Cars occitanofònes e occitanofiles,

Mentre que’s perhilan lo cap de l’an e lo començar d’un « desembarrament », aquesta letra d’informacion que s’encuenta deus dispositius de tot ordi metuts en plaça per l’Ofici e los sons partenaris, entà sostiéner la lenga occitana en ua annada tant a despart. Que hasèva, de hèit, besonh assolidà’s que la distanciacion fisica ne rime pas dab distanciacion sociau o lingüistica, mei que tot entaus nostes eslhèves : atau qu’èra lo sens de l’operacion « L’Òc en VOD », o enqüèra deu chèc-libe « Libe-Libre ».

Lo bilanç de la rentrada que dèisha totun auburar las consequéncias de la crisi sanitària suu desvolopament de l’ensenhament : mensh d’informacion hèita cap aus parents, alavetz mensh d’escolans inscrivuts en cordèra bilingua. Sus aquò que cau hornir la reforma deu licèu e deu bachelierat, que confirma en aquera segonda rentrada los sons efèits dramatics tà çò deus efectius en licèu.

Los desvolopaments obtienuts aquestas darrèras annadas que son freules. A maugrat deus resultats de l’enquèsta sociolingüistica e de l’adesion clara de las populacions, transméter la lenga que demora enqüèra ua politica de deféner, de har conéisher, e mei generaument ua batèsta culturau de ganhar. Que’ns cau andar en mei d’ua pagèra, geograficas com temporaus. Entà l’Ofici, en la pagèra locau, que passa mei que mei per la mesa en plaça e lo seguit estret de convencions academicas, o lo desplegament de dispositius dedicats. L’adopcion de convencions entà l’ensenhament de l’occitan dens las academias de Tolosa e Montpelhièr, l’arribada d’un navèth encargat de mission « ensenhament » a l’Ofici, metut a disposicion peu ministèri de l’Educacion nacionau, las candidaturas importantas au dispositiu Ensenhar Professors en 2020, que son autandas pistas positivas d’assolidar. A la pagèra nacionau, que s’ageish, enter autas causas, de’ns har enténer las votz dens los diferents debats, com aqueth qui sòrt de s’acabar, sus l’aviéner deus mèdias publics.

Dab ua equipa ahortida, l’Ofici que va tanben poder entinoar navèths tribalhs : aqueth de la formacion professionau dab las Regions e los Rectorats, aqueth de la socializacion de la lenga au truvèrs de la mobilizacion de las intercomunalitats, enfin, aqueth d’ua estrategia mei hòrta au nivèu nacionau dab los autes oficis e collectivitats concernidas per las lengas e culturas regionaus.

Charline CLAVEAU,

Presidenta de l’Ofici public de la lenga occitana – Conselhèra regionau Novèla-Aquitània delegada a las lengas e culturas regionaus