Constituïr un fons documentari
Elegits/idas, tecnician.a.s d'una collectivitat, desiratz constituïr e metre en accès un fons documentari ? L'OPLO vos acompanha !
Qu’es aquò ?
La mesa en plaça d’un fons documentari en occitan consistís, per las collectivitats, a amassar e entretenir de documents de diferentas naturas (libres, archius, revistas, enregistraments sonòrs o audiovisuals, etc.), a los tractar e los metre en accès per de publics variats : legidors/trizs, aprenent.a.s, praticien.a.s, ensenhant.a.s o cercaires/ras.
Lo desvolopament o la creacion d’una tala ofèrta documentària poirà far resson a de fonzes preexistents, sustot patrimonials (nombroses dins las bibliotècas istoricas dels territòris de l’espaci occitan) e/o s’inscriure dins una accion globala de la collectivitat per valorizar l’occitan sus son territòri (obertura de classas bilinguas o d’escòlas immersivas, desvolopament d’una entrepresa de collècta de la memòria, etc.).
Perqué ?
- Promòure la lenga istorica del territòri e favorizar la pluralitat de las expressions culturalas ;
- Garantir un accès a totes los publics a la creacion actuala e al patrimòni ligats a la lenga e a la cultura occitanas ;
- Valorizar e far conéisser las caracteristicas culturalas de son territòri al près dels novèls/elas resident.a.s aital coma d’actors toristics e economics ;
- Favorizar l’aviada de practicas culturalas en occitan, accessiblas a totes/as, occitanofòn.a.s o non.
Cossí ?
Lo CIRDÒC – Institut occitan de cultura consèrva una colleccion publica de referéncia (labellizada Colleccion d’excelléncia), en occitan e relativa a l’occitan, ric de mai de 200 000 documents.
Fòrt de son experiéncia e de sas competéncias mestièrs, lo CIRDÒC acompanha las collectivitats e lors establiments dins lor projècte de constitucion e de valorizacion d’una ofèrta documentària a l’entorn de la lenga e la cultura occitanas.
Dins l’encastre de sa politica de cooperacion, lo CIRDOC prepausa atal diferentas accions e servicis :
- ETAPA 1 – Identificacion dels besonhs e dels publics de la ret de lectura publica del territòri ;
- ETAPA 2 – Definicion del projècte, de la politica d’aquisicion a la valorizacion al près dels publics ;
- ETAPA 3 – Ajuda a l’aquisicion de l’ofèrta documentària : mesa a disposicion de ressorsas e documentacions, conselh e ajuda a las aquisicions, velha sus l’actualitat editoriala ;
- ETAPA 4 – Formacion professionala : identificacion dels sabers e saber-far a aquerir, informacion sus las formacions disponiblas o començada d’accions cibladas, mesa a començada d’accions cibladas, mesa a disposicion d’espleches tecnics e de donadas documentàrias (SIGB, donadas bibliograficas) ;
- ETAPA 5 – Assisténcia : ajuda al catalogage e a la gestion del fons documentari creat.
Per vos ajudar
Servici d’informacion, expertesa documentària, acompanhament de projèctes, accions de formacion, prèst d’exposicions, prèst de salas e de supòrts de mediacion :
- Centre internacional de recèrca e de documentacion occitanas (CIRDÒC – Institut cultural de cultura)
www.oc-cultura.eu / secretariat@oc-cultura.eu
Desvolopament de l’ofèrta d’ensenhament, mesa en relacion amb los operators de terren, espleches de promocion e de valorizacion, ressorsas a destinacion dels elegit/ida.s e dels agents de las collectivitats :
- Ofici public de la lenga occitana (OPLO)
www.ofici-occitan.eu / contact@ofici-occitan.eu
Una question ? Contactatz l'OPLO !
Ne saber + suls projèctes relatius a la lenga occitana :
Office public de la langue occitane
22 boulevard du Maréchal Juin
31406 Toulouse cedex 9
05 31 61 80 50
contact@ofici-occitan.eu
