En octobre de 2020, l’Ofici public de la lenga occitana lançèt, a títol experimental, la primièra edicion del dispositiu Libe-Libre ! en Novèla Aquitània, en partenariat amb l’Associacion dels Libraris independents de Novèla Aquitània (LINA).
Aquela operacion, finançada gràcias a de crèdits excepcionals de la Region Novèla Aquitània, a permés la distribucion d’un chèc-libre d’un montant de 20€ destinat a totes los enfants escolarizats en ensenhament immersiu, bilingüe o renforçat sus las acadèmias de Bordèu e Limòtges (1r gra), siá mai de 2 500 beneficiaris potencials (mai d’informacion aquí : https://www.ofici-occitan.eu/oc/dispositiu-libe-libre/).
Aquela primièra edicion, que s’es desvolopada dins un contèxt complexificat per la crisi sanitària, es estada unanimament saludada pels participants, professionals del libre coma per la comunautat educativa. A fait l’objècte d’una avaloracion disponibla en telecargament çai jos e dins la mediatèca (https://www.ofici-occitan.eu/oc/mediateca/).
Amb un taus d’utilizacion correspondent a 84% dels escolans escolarizats, lo succès d’aquela primièra edicion es susceptible d’encoratjar son renovèlament quitament son espandiment tanben sul plan geografic (Occitània) qu’al nivel dels publics (2d gra).
