L’occitan dins lo superior
L'occitan dins lo superior, son de percorses diplomants / certificants despartits sus tot lo territòri, de la L1 al Doctorat, accessibles en formacion iniciala, contunha o autanplan sens lo bac.
6 BONAS RASONS DE FAR VÒSTRES ESTUDIS EN OCCITAN
Dins lo superior, l’ofèrta de formacion a l’entorn de la lenga e de la cultura occitanas cobrís l’ensem del territòri. Una continuitat dels percorses es assegurada de la L1 al Doctorat (e en comptant tanben de diplòmas d’universitat accessibles sens lo bachilierat). Entre las disciplinas ensenhadas, se tròban la cultura, l’istòria, la literatura, la sociolingüistica, la gestion de politicas publicas / l’amenatjament lingüistic al nivel public, la didactica, lo torisme… Tot depend de vòstra formacion iniciala e de vòstre projècte !
Far sos estudis dins l’ensenhament superior en occitan, es participar a una dinamica en favor de la pluralitat e de l’egalitat lingüistica en França, en Euròpa e dins lo mond. Es se jónher a de rets dinamicas suls campus, dins las associacions o sus las rets socialas. Es beneficiar d’un sosten e de ligams solids amb sos pars e la comunitat de locutors. La màger part del temps, aqueles ligams que fan sens perduran al delà dels estudis.
Que debutètz vòstra formacion en L1 o que vos vos reorientètz après un primièr diplòma (Licéncia, Mastèr o DE DETLO), las formacions superioras vos prepararàn als mestièrs de la comunicacion, de l’ensenhament e de la formacion, de l’animacion e de l’accion sociala, de la traduccion e de la documentacion, de la cultura, de la creacion e del libre… Totes aqueles sectors essencials recrutan : pas que sus l’ensenhament, de nombroses pòstes aurián besonh d’èsser provesits cada annada per respondre als besonhs !
Tot lo long de vòstre cursus, de professionals dedicats se tenon a vòstra disposicion per vos ajudar a elaborar vòstre projècte professional, per vos orientar dins vòstre percors, per vos acompanhar dins vòstras demarchas (subretot per obténer d’ ajudas financièras). Que s’agiscan de vòstres ensenhaires, dels personals administratius, de l’OPLO o de la Region, esitetz pas a les contactar : son ailà per vosautres !
Causir d’estudiar l’occitan (o en occitan), es aver la possibilitat d’efectuar un o mantun semèstres a l’estrangièr (d’acòrds ERASMUS existisson amb Catalonha, los Balears o Itàlia per exemple). Es tanben se familiarizar als mecanismes d’intercompreneson de las lengas, en particular per las lengas romanicas, e èsser mai a la comoditat per parlar d’autras lengas. En un mot, estudiar l’occitan, es se dobrir al mond !
Bastir son projècte professional a l’entorn de l’occitan, es inscriure son percors de vida al còr d’un territòri e de son imaginari. Es se donar los mejans de conéisser mai /melhor e s’apropriar aquel territòri, sa cultura e los rapòrts al mond de sos abitant/e/s. Es tornar dins l’univèrs d’una lenga millenària e ne descobrir las multiplas facietas e variantas, de Gasconha a Provença, en passant per Lemosin, Auvèrnha e Lengadòc. Es la garantida de s’orientar de cap a d’emplecs durables e non-delocalisables. Alara esitetz pas mai !
Actors associatius, de l'ensenhament o de la formacion, avètz la possibilitat de demandar lo mandadis d'afichas e de desplegants a partir d'aquela pagina :
Carta de l’ensenhament de l’occitan :
Una question ? Contactatz-nos !
Ne saber mai sus l'aprendissatge de l'occitan :
Ofici public de la lengua occitana
22 bd maréchal Juin
31406 Tolosa cedex 9
Tel 05 31 61 80 50
contact@ofici-occitan.eu
