Una convencion sus tres ans amb Lo Congrès per confortar la regulacion de la lenga occitana
L’Ofici public de la lenga occitana e lo Congrès permanent de la lenga occitana venon de signar una convencion sus tres ans. Aquela convencion pretend confortar la produccion e la difusion de ressorças lingüisticas, subretot vài la plataforma locongres.org e la regulacion de la lenga occitana dins lo respècte de sas variacions dialectalas. Reconéis tanben lo Congrès permanent de la lenga occitana coma acadèmia de la lenga occitana.
Creat al Conselh regional d’Aquitània lo 16 de decembre de 2011, lo Congrès permanent de la lenga occitana foguèt portat e volgut per las principalas associacions e institucions (Conselhs regionals e generals, Estat) qu’òbran per l’estudi, la promocion e la transmission de l’occitan.
De mai, un representant de l’Ofici public de la lenga occitana va integrar ongan lo Conselh dels usatgièrs del Congrès permanent de la lenga occitana per tal notadament de melhorar l’articulacion de las doas institucions.
Una novèla dinamica de convencionament
Amb aquela convencion pluriannuala, l’Ofici engatja una novèla dinamica de convencionament. S’inscriu dins una logica d’estructuracion e de renfortiment de son ròtle d’interfàcia entre actors de terrenh e actors institucionals. La convencion amb lo Congrès es la 1a etapa d’aquela estrategia.
