Gardar lo ligam malgrat la situacion sanitària
Cada annada dins Navèra Aquitània son organizadas jornadas occitanas de ligason collègi-licèu. A aquela ocasion, los escolans occitanistas d’aqueles establiments s’encontran durant una jornada a l’entorn de talhièrs e de moments culturals en occitan. Aquelas jornadas an vocacion a s’espàrger dins las annadas venentas als establiments d’Occitània.
Aquel eveniment revestís una importància particulara al regard de la baissa significativa dels efectius en licèu per l’annada 2020-2021 (anant de -15% a -44% segon las acadèmias).
Après una anullacion d’aquelas jornadas en 2020 puèi en 2021 en rason de la crisi sanitària, una alternativa numerica es estada pensada per crear e gardar lo ligam malgrat la distància.
Un messatge d'encoratjament en fin d'annada escolara
Dins un retrach vidèo rapid e divertissent, una trentena de professionals del mond occitan (esportius, comerciants, professors, artistas, agricultors…) an prestat lor imatge e lor votz per adreçar un messatge d’encoratjament a las joventas generacions que desiran aprene o contunhar a aprene la lenga occitana.
De ressorsas pels 11000 collegians e liceans que aprenon l'occitan
Aquelas ressorsas numericas son estadas concebudas per respondre a la demanda dels professors d’occitan dels collègis e dels licèus de Navèra Aquitània e d’Occitània que las poiràn utlizar dins l’encastre de lors corses. En tot, prèp de 11 000 collegians e liceans son concernits.
Las vidèos de la sèria “Ligats” seràn difusadas totes los dimècres del mes de junh sus la pagina Facebook de l’Ofici public de la lenga occitana (@ofici.occitan)
