L’OPLO lança una granda campanha de comunicacion a l’entorn de la lenga occitana

Es una campanha de comunicacion inedita que l’OPLO lança aquel diluns 24 de mai. Pel primièr còp, un disposi­tiu de sensibilizacion del grand public a l’occitan va èsser desplegat, en si­multanèu sus l’ensemble del territòri interregional.

« S’agís d’una campanha que pretend interpelar directament los abitants de nòstras doas regions per lor far préner consciéncia de l’occitanitat de lor environament », explica Charline CLAVEAU, conselhièra regionala dele­gada de Novèla-Aquitània e presidenta de l’OPLO. « A travèrs diferents visuals, los anam encoratjar a s’interessar a una lenga e una cultura que tròban de ressons dins lor vida vidanta ».

Dins un primièr temps, de visuals seràn desplegats sus de supòrts fisics e numerics, sus l’ensemble de las doas regions : garas SNCF (grandas linhas e TER), abribus, street-marketing, espacis publicitaris dins la premsa, malhums so­cials (Instagram/Snapchat/Facebook), publicitats geolocalizadas via las dife­rentas plataformas, licèus… La mecani­ca, que repausa sus una interpelacion dirècta, pretend dessobtar e generar de trafic sus un site web especialament concebut.

« Aquela campanha es totalament inedita : per son objècte, per son es­pandiment e per son messatge », detalha Charline CLAVEAU. « Jamai una cam­panha de sensibilizacion a l’entorn de l’occitan es pas estada desplega­da en direccion del grand public, a l’escala interregionala, en simulta­nèu sus un territòri tan vast e en tot espotir deliberament los còdis ».

Se la transmission de la lenga demora l’urgéncia, son apropriacion pels abi­tants es un enjòc capital. L’escomesa que devèm tenir es collectiva : moder­nizar l’imatge de l’oc e assolidar l’es­tacament emocional que pòt suscitar

La campanha s’apieja sus de mots franceses d’origina occitana fixats sus de visuals en creant un decalatge conivent. Charline CLAVEAU precisa : « Avèm volontàriament causit d’optar per una tonalitat adaptada a una tòca joventa. D’en primièr per çò que , per que la lenga occitana visca, cal que siá transmesa a las novèlas ge­neracions. Mas subretot perque, per desgatjar un vertadièr capital simpa­tia de cap a l’occitan, es als joves que se cal adreçar. Après mai d’un an de confinhament, lor adreçam un messa­tge positiu, per lor dire que l’occitan, fòrça mai qu’una lenga, es abans tot un estil de vida ».

Dins un segond temps, la campanha serà declinada a l’escala locala. De vi­suals novèls seràn editats en prepau­sant de mots e expressions especifics als diferents territòris.                  

« Anam prepausar a las collectivitats de repréner la campanha per la desplegar dins lors pròpris espacis de comunica­cion. Mantes departaments, intercomu­nalitats e comunas an ja integrat l’occi­tan coma marcador identitari territorial modèrn. Per que los abitants s’apròprien lor lenga, devèm renforçar aquela arti­culacion entre dimension interregionala e identitats localas », conclutz Charline CLAVEAU.