Reaccion conjunta au recors contra la lei Molac sus las lengas

« Nosaut(a)s, Presidentas e President deus Oficis publics de las lengas basca, bretona, catalana e occitana, que nos impòrta hèra d’exprimir amassa la nosta desahida, la nosta incompreension e lo noste desplasèr davant la sasina deu Conselh Constitucionau sus la lei Molac relativa a la proteccion de las lengas regionaus e a la lor promocion.

Despuish annadas, la construccion de las politicas publicas en favor de las lengas regionaus e l’accion deus actors de terrenh que se tuman a un quadre juridic pro clavat e a trebucs e travas nombrós e recurrents dens mantuns domenis.

Rapòrt a n’aquò, la lei Molac que pòrta un quadre legau que permet de securizar practicas larjament espandidas suus nostes territòris e d’anar de cap tà un desvolopament facilitat e perenne. Qu’estó escrivuda e portada dens un esperit de construccion d’un consensus larg que lo vòte majoritari deu 8 d’abriu passat a clarament confirmat.

Lo recors davant lo Conselh Constitucionau hèit per 61 deputats aqueth 22 d’abriu, que va au contra d’aqueth consensus, qu’ei de dòu har e qu’u avem degreu.

Qu’esperam ua desgessida positiva, e que demoram encarats a obrar entà har vàler un quadre legau facilitator e rassegurant, qui permétia l’espandiment d’ua politica publica volontarista responent a ua demanda sociau e a un consensus societau, politic e institucionau que contunharàm a lhevar e acompanhar ».