Pel primièr còp, l’Ofici public de la lenga occitana e lo rectorat de l’acadèmia de Tolosa dobrisson un apèl a candidaturas dins l’encastre del dispositiu ENSENHAR Professor.
ENSENHAR Professor, qu’es aquò ?
ENSENHAR Professor es un dispositiu pilotat per l’Ofici public de la lenga occitana (OPLO), en collaboracion amb los servicis de l’Educacion nacionala de l’acadèmia de Tolosa, als nivèls rectoral e departamental.
S’agìs de formar, sus una annada escolara, d’ensenhaires capables d’ensenhar l’occitan e en occitan.
Per la dintrada 2021-2022, l’OPLO assumís l’integralitat del còst de la formacion, la remuneracion dels professor-a-s del 1r e del 2d gra essent assegurada per l’Educacion nacionala e mantenguda en totalitat.
A qual s’adreiça aquest dispositiu ?
Totes los ensenhaires del 1r gra pòdon ensenhar la/en lenga occitana e aqueles del 2d gra pòdon èsser abilitats en occitan quina que siá lor disciplina.
ENSENHAR Professor s’adreça als ensenhaire-a-s titular-a-s que :
- Son en pòste al dintre de l’Educacion nacionala (1r e 2d gra) dins l’acadèmia de Tolosa e benefician d’una inscripcion al Plan Academic de Formacion de Contunh;
- Son en disponibilitat (non-remunerats per l’Educacion nacionala) ;
- Benefician d’un comjat de formacion fòra acadèmia de Tolosa.
Cossí aquò se passa ?
Los candidats se deuràn inscriure sus GAIA e adreçar un dorsièr al rectorat e a l’Ofici public de la lenga occitana.
- Una comission s’acamparà lo 14 d’abrial per recebre qualques candidats.
- Los (las) professor-a-s benefician d’una descarga de cors a temps plen pendent los 10 meses de la formacion, sus la totalitat d’una annada escolara en tot alternar cors e estagis en classa.
Webinari d’informacion lo 24 de març 2021 a 16:00
Per tal de respondre a vòstras questions, l’OPLO vos prepausa un webinari lo dimècres 24 de març de 2021 de 16h a 17h30. Per vos inscriure e pausar vòstras questions, rendètz-vos sus aquela pagina.
Depaus de las candidaturas dels ensenhaires :
entre lo 03 de març e lo 05 d’abrial de 2021.
