Qu’estó un plaser d’estar recebut diluns 7 d’abriu recebut diluns 7 d’abriu per la Mission deu Senat d’informacion sus l’avaloracion de la Lei de mai de 2021 relativa a la proteccion patrimoniau de las lengas regionaus e a la lor promocion, dita « Loi Molac ».
Los raportaires de la mission, lo senator deus Pirenèus Atlantics Max Brisson e la senatora de Léger-Atlantic Karine Daniel, qu’an escotat, dab sensibilitat, cultura e expertesa suu subjècte, las analisis de l’Ofici Public de la Lenga Occitana e deus Oficis Basco, Breton e Catalan entà partatjar los constats e las problematicas de cadun.
Que ns’èm tots acordats suu hèit qui la lei dita « Molac » qu’ei ua atruna essenciau de la començada de la transmission de las lengas regionaus en França. Las collectivitats locaus, com las Regions Navèra Aquitània e Occitània, que l’an plan comprés en desvolopant politicas en favor de la socializacion de l’occitan shens la quau la transmission ne pòt pas har víver la lenga e en posicionant l’Ofici Public de la Lenga Occitana com ua atruna d’engenheria au servici de las collectivitats.
Qu’èm estats nombrós a acordà’s suu hèit que, après los espèrs grans qui an acompanhat lo vòte d’aquera lei en mai de 2021, que constatam los efèits limitats suu terren au dia de uei : manca de volontarisme o de fluiditat dens l’aplicacion de la lei, manca de ressorsas e de mejans dedicats…
De cap a las nostas intervencions, M. lo Senator Brisson e Dna. la Senatora Daniel que’s son engatjats qu’aquera mission d’informacion amasse los qui òbran entà que viscan las nostas lengas entà cercar tots amassa solucions e qu’un rapòrt sia presentat a la Comission Cultura deu Senat e remetut a M. lo President deu Senat, Gérard Larcher.
Esperem qu’aqueras proposicions aboteishen sus decrets, circularas, o – qui sap ? – sus ua lei navèra, qu’aqueras proposicions qu’aboteishen a ua vertadèra concòrdia enter l’Estat e las collectivitats locaus engatjadas entà ua vertadèra proteccion e promocion de las lengas regionaus en França e ua aumentacion deus locutors actius en basco, breton, catalan, creòle(s), en mahorès…. E plan segur en occitan !
Jean-Luc Armand
President de l’Ofici Public de la Lenga Occitana
