L’Ofici que demòra auprès de vos pendent la temporada de confinhament
Adishatz,
En seguida de las anóncias deu govèrn de cap a la luta contra la propagacion deu virús covid-19, que desiri vos tenir informats de las mesuras presas a l’Ofici public de la lenga occitana, entà assegurar ua continuitat de servici.
Desempuish lo diluns 16 de març, e entà tota la durada deu confinament decretat per l’Estat, los servicis de l’Ofici que contunhan de foncionar a distància. Que podetz jónher los vòstes interlocutors abituaus com a l’acostumat, aus numeròs de telefònes abituaus o per corric.
Tanben, per çò que concerneish la mesa en òbra de las activitats de l’Ofici :
VÒTE DE LAS SUBVENCIONS 2020
La nosta Assemblada generau seguenta que’s tienerà com previst debuta d’abriu. Per esgard deu contèxte, totun, que se tienerà de faiçon desmaterializada, entà notadament poder adoptar un sostien financèr a las accions de desvolopament de la lenga occitana e atau non pas penalizar los operators.
DEMANDA DE PAGAMENT DE LAS SUBVENCIONS
Que vos aconselhi de priviliejar los corrièrs electronics meilèu que los corrièrs postaus entà enviar los justificatius entau pagament de las subvencions. En efèit, n’avèm pas la certituda que los servicis postaus o de recepcion deu corrièr a l’Ofici foncionaràn enqüèra dens los dias qui arriban.
PAGAMENT DE LAS SUBVENCIONS
Com tota administracion publica, qu’ei la Direccion de las finanças publicas qui paga las subvencions sus la basa d’ua demanda de pagament de l’Ofici (DRFIP Occitania per çò que nos concerneish).
Ua nòta de la Direccion de las finanças publicas que nos informa que lo lor servici non pòt pas foncionar de faiçon optimau en aqueth periòde de confinament.
Atau, que nos ei demandat de priorizar los pagaments mei urgents. L’Ofici que demandarà donc en prioritat los pagaments de las subvencions de las associacions qui an cargas de salari.HONS D’URGENCIA
Las Regions e l’Estat que son a hicar en plaça un hons d’urgéncia entà viéner en sostenh de las associacions que patiràn de la crisi sanitària que rescontram. Per cas de dificultats de dinereria, ligadas a ua baisha d’activitat e donc de rentrada de moneda abituau, mercés de las comunicar au mei viste a la vòsta interlocutritz o lo vòste interlocutor abituau au dentre de l’Ofici qu’assegurarà lo ligam dab las tutelas nostas.
|
