La vòstra estructura mèna accions de desvolopament de la lenga occitana (transmission – socializacion) ? Cossí beneficiar del sosten de l’OPLO ?
Las associacions e los organismes portaires d’un projècte en ligam amb la lenga occitana pòdon beneficiar d’una subvencion de la part de l’OPLO… sota qualques condicions.
Mòde d’emplec !
L’Ofici public de la lenga occitana (OPLO), per l’atribucion de subvencions, ajuda cada annada d’operators publics o privats (associacions en particular) qu’òbran a la transmission e a la socializacion de la lenga occitana sul territòri de las regions Novèla-Aquitània e Occitània.
Aquelas subvencions son atribuidas dins l’encastre d’una delegacion de mejans e de competéncias de las Regions Novèla-Aquitània e Occitània, atal coma de l’Estat, membres fondators de l’Ofici.
Lo vòstre projècte es elegible ?
Mantunes critèris son decisius per poder pretendre a una subvencion de l’Ofici public de la lenga occitana. Los conéisser en amont pòt estalviar plan de contrarietats e de pèrda de temps.
Los camps d’intervencion
L’Ofici public de la lenga occitana sosten exclusivament las accions ligadas a la politica linguistica, e notadament :
- la transmission de la lenga occitana ;
- lo desvolopament de son usatge, sa socializacion ;
- la difusion de la lenga occitana.
Atencion : per s’inscriure dins una reala desmarcha de socializacion o de transmission, l’accion desvolopada deu èsser repetida o recurrenta. Atal, per exemple, una manifestacion ponctuala ligada a la lenga e la cultura occitanas entra pas dins lo camp d’accion de l’OPLO, mentre qu’un malhum de corses per adulte regular, el, ne fa partida.
Punt de vigilància : la politica culturala (sosten a las manifestacions, a la creacion e la difusion de practicas/òbras artisticas, industricas creativas) demòra de competéncia comunala, intercomunala, departamentala, regionala o estatica e entra doncas pas dins lo camp d’accion de l’OPLO.
Pro del cumul !
Per èsser elegibles a una subvencion de l’OPLO, los projèctes deuràn pas recebre cap autre finançament especific de la part dels Conselhs regionals membres de l’Ofici public de la lenga occitana, tal coma Occitània e Novèla Aquitània, ni tanpauc de la Delegacion Generala a la Lenga Francesa e de las Lengas de França del Ministèri de la Cultura.
De saber !
Per beneficiar d’una subvencion, es insdispensable de dispausar d’un numerò SIRET, o d’un RNA se l’estructura que demanda es una associacion
En cas de question, es possible de s’adreçar directament a l’OPLO via nòstra pagina : “nos contactar”.
De clicar :
Per obtenir un modèle de demanda de subvencion e la carta d’utilizacion dels logòs de l’OPLO, connectetz-vos sul site de l’Ofici a l’adreça que seguís : “teledescargament”.
Caminament per despausar son dossièr de candidatura
Mai d’una modalitat es possible per candidatar e remetre son dossièr de subvencion rensenhat.
- Per corric ambe acusat de recepcion a l’adreça que seguís : contact@ofici-occitan.eu
- Per corrièr ambe acusat de recepcion a l’adreça que seguís : Office public de la langue occitane, 22 boulevard du Maréchal Juin, 31406 Toulouse Cedex 9
Quin calandièr per demandar una subvencion ?
Per l’annada 2021, los dossièrs de demanda de subvencion son de remetre al mai tard lo diluns 4 de genièr de 2021 a 12h.
Ofici public de la lengua occitana
22 bd maréchal Juin
31406 Tolosa cedex 9
Tel 05 31 61 80 50
contact@ofici-occitan.eu
