Dins l'encastre de l'elaboracion de son « kit collectivitats », l'OPLO ven de finalizar l'edicion d'espleches destinats a acompanhar las collectivitats qu'acceptarián de designar un.a elegit/ida referent.a per las questions de politica lingüistica.
Perqué designar un.a elegit/ida a l'occitan dins una collectivitat locala ?
La delegacion d’un.a elegit/ida a l’occitan consistís a identificar, demest los/las elegit/idas d’una collectivitat, un.a referent.a per las questions relativas a la lenga e a la cultura occitanas. Se pòt agir de far lo ligam amb las instàncias academicas dins l’encastre del desvolopament de l’ofèrta d’ensenhament (cursus bilingües, calandretas, ensenhament afortit…), de promòure la cultura e la lenga dins las politicas localas, de pilotar de projèctes culturals o lingüistics o de considerar una declinason locala de las estrategias regionala e departamentala pel desvolopament de l’occitan.
Lo o la delegat/ada pòt èsser nommat/ada a l’escala de la comuna, de l’intercomunalitat o de tot autre EPCI.
Quals enjòcs ?
La designacion, dins una equipa municipala o d’un EPCI d’un.a elegit/ida a l’occitan es una oportunitat per :
- Marcar la volontat politica de l’equipa de s’engatjar per la lenga occitana ;
- Considerar la promocion de l’occitan de faiçon transversala (ligam amb la politica educativa, la politica culturala, l’atractivitat del territòri, la denominacion de las vias, etc.) ;
- Identificar un.a interlocutor/-tritz al près dels partenaris institucionals (rectorat, DRAC) e sustot la Region dins l’encastre de son estrategia lingüistica (Fuèlha de rota 2021/2027 per las lengas regionalas en Novèla Aquitània, Plan Cultura viva en Occitània) ;
- Engatjar una reflexion crosada sus l’animacion culturala occitana : fèstas e festenals, ancoratge territorial, territorialisation culturala, creacion, emplec, etc. ;
- Valorizar un engatjament plebiscitat per una larja majoritat de la populacion.
L’ensemble de las informacions tecnicas relativas a la designacion d’un.a elegit/ida es compilat dins una ficha. Aquela ficha, acompanhada d’una pagina dedicada sul sit internet de l’OPLO, serà integrada dins un « kit collectivitats » difusat lèu sul territòri e mes a la disposicion dels actors sus demanda.
