Dempuèi mantunas annadas, l’OPLO e sas tutèlas (Regions e rectorats) son sollicitats pels actors educatius, associatius e institucionals per concebre e metre a disposicion aisinas permetent de valorizar las filièras que recrutan en occitan.
Cada annada, desenats de diplomat son efectivament recrutats per d’entrepresas, d’estructuras publicas o d’associacions gràcias a lors competéncias en lenga occitana. Demest los sectors que recrutan, se pòt trobar los mestièrs de la comunicacion, los mestièrs de l’accion sociala e de l’animacion, los mestièrs de l’ensenhament e de la formacion, los mestièrs de la traduccion e de la documentacion, los mestièrs de la cultura, de la creacion e de l’edicion…
Per nòstras Regions e los servicis academics, la valorizacion de l’ensemble d’aqueles fialats es un enjòc essencial per promòure e renforçar l’atractivitat de las formacions inicialas e continuas a l’entorn de la lenga occitana.
Un document concebut en partenariat amb los actors concernits
En collaboracion amb l’ONISEP e lo CREO, l’OPLO a concebut un desplegant especific per valorizar totes aqueles fialats. Farà lo ligam amb la renovacion en cors de la plataforma www.occitanetudesmetiers.com e un autre document destinat a promòure los percors de formacion dins l’ensenhament superior.
Aquel document es mes a disposicion en telecargament sus una pagina dedicada del site de l’Ofici public de la lenga occitana. Poirà tanben èsser mandat en version papièr per via postala, sus demanda dels actors concernits (formulari sus la meteissa pagina).
D'enjòcs especifics sul licèu
La realizacion d’aquela aisina s’inscriu dins l’encastre del Plan d’accion licèu per la lenga occitana, finançat per la Region Novèla-Aquitània e la Region Occitània, en collaboracion amb lo Ministèri de l’Educacion nacionala e lo Ministèri de la Cultura. Serà aital difusat en prioritat alprès dels liceans de las doas Regions dins las setmanas e meses a venir.
L’OPLO e sos partenaris mercejan los actors qu’an acceptat de participar a aquel projècte.
