En partenariat amb lo Ministèri de l’Educacion nacionala, las Regions Novèla-Aquitània e Occitània lançan un chèc present de 15€ a totes los escolans de la 3a a la Terminala que seguisson un aprendissatge en occitan
Un chèc-present 15€ a mai de 3000 escolans per comprar un libre en occitan
A partir del 1èr de febrièr, l’Ofici public de la lenga occitana (OPLO) lança l’operacion Libe-Libre! : un chèc-liure distribuït a cada escolan de 3a, 2da, 1èra e Terminala que seguís un ensenhament de l’occitan al collègi o al licèu. En Novèla-Aquitània e Occitania, mai de 250 collègis e 70 licèus prepausan un ensenhament en lenga occitana, çò que correspond a mai de 3000 escolans. Cada establiment a recebut son lòt de chècs a remetre a sos escolans.
“Après la capitada de l’edicion de l’an passat que s’adreçava sonqu’a las escòlas primàrias de Novèla-Aquitània, causiguerèm de tornar calibrar l’edicion 2022 per l’orientar de cap a un public d’adolescents e de l’esténer a l’ensems del territòri interregional, Occitània e Novèla-Aquitània”, explica Jean-Luc ARMAND, president de l’OPLO e conselhèr regional delegat de Novèla-Aquitània. “Aquesta operación s’inscriu dins lo Plan d’Accion Licèu per la lenga occitana votat l’an passat e que consistís a desplegar mantunas accions tot lo long de l’annada per encorajar l’aprendissatge de la lenga occitana al licèu e sa continuitat dempuèi la 3na”.
Far sortir l'occitan de la classa e sostener la filièra del libre
Aquel chèc individual permetrà als professors d’occitan qu’o desiran d’acompanhar lors escolans dins la causida de lor obratge en occitan. De sesilhas de presentacion e d’escambis poiràn per exemple èsser organizadas amb los libraris independents partenaris de l’operacion. Aquela accion, desplegada mercés a un cofinançament excepcional de la Region Novèla-Aquitània, de la Region Occitània e del Ministèri de l’Educacion nacionala vòl abans tot respondre a una demanda dels professors dels collègis e dels licèus per aisinar los escolans.
“ Per fòrça collegians e liceans occitanistas, l’occitan demora mai que tot una matèria escolara”, rapèla Benjamin ASSIE, vice-president de l’OPLO e conselhèr regional d’Occitània delegat a las lengas occitana e catalana. “Aquel tipe d’operacion a per tòca de los dubrir al monde cultural occitan qu’ existís en defòra de l’escòla. Mes l’enjòc, per nosautres, al nivel de la Region, es tanben de sostener l’ensems dels actors de la filièra del libre en occitan”.
Una vintenat d’editors en lenga occitana se son atal mobilizats per prepausar una causida la mai ample possible als escolans. Un partenariat fuguèt egalament fargat amb las associacions de librariás independentas de Novèla-Aquitània (LINA) e d’Occitania (ALIDO) e tanben Occitanie Livre & Lecture per encoratjar mai activamente los escambis dirèctes entre los joves e los libraris.
