Cars partenaris institucionaus,
Cars responsables associatius,
Cars actors de la lenga nòsta,
Madama, Mossur,
Es damb un estrambòrd non estujat que préni la pluma anèit per daubrir aqueth numerò 7 de la nòsta letra d’informacion « Correspondéncia », lo purmèir per jo en aquera debuta de mandat au cap de l’Ofici com conselhèr regionau de Novèla-Aquitània. Se joénhan a jo Benjamin Assié, 1èir Vice-President de l’OPLO e representant de la Region Occitania, e Mostafa Fourar en tant que 2nd Vice-President que representa l’Estat.
Es tanben l’ocasion de vos mandar los mens vòts per aquera novèra annada, que vos desiri plan granada, solide, e damb la santat mei que tot. Mes comptatz pas sus jo per tombar dens l’embrunida ambienta !
L’Ofici acabèt l’annada 2021 sus una nòta positiva capvath l’obtencion dau Gran Prèmi Cap’Com. Aquera distinccion per los professionaus de la comunicacion publica au nivèu nacionau ven recompensar lo projècte de campanha « Je me jette à l’oc ». Es l’eretatge de l’equipa precedenta e en particular de la mia predecessora Charline Claveau, a la quala vòli render aumatge aquí per son engatjament e son bilanç. Entendi bien, atau, endralhar aqueth mandat dens la continuitat daus principis fondators de l’Ofici : menar una politica linguistica partenariala ambiciosa e d’interés generau.
Aquò dit, un cambiament d’equipa dèu tanben èster lo parat de hèser un bilanç d’etapa e d’avalorar las accions menadas dumpèi la creacion de l’OPLO, 6 ans i a adara. Es un processus entamiat fin de 2021 que se vai perseguir dinc a la fin dau purmèir semèstre de 2022, per fin de nos perméter de reinventar lo nòste avenir en partenariat damb las collectivitats e los actors associatius.
Sonqu’una causa segura çaquelà, l’escomesa màger que nos atend engüan serà de segur la renegociacion de la convencion-quadra interacademica de desvolopament de l’ensenhament de l’occitan, en ligam damb lo Ministèri de d’educacion nacionala. La recenta lei Molac nos daubrís perspectivas significativas a la condicion que siqui acompanhada d’una volontat e daus mejans que siquin a la nautor daus enjòcs.
Devem donc damorar amassats per honhar dens lo misma sens e contunhar de ganhar joens locutors mei damb la tòca de véser se reviscolar la lenga nòsta capvath las generacions futuras.
Una bona e urosa annada a totas e a tots.
Jean-Luc Armand
President de l’Ofici public de la lenga occitana
Conselhièr regionau de Novèla-Aquitània delegat a las lengas e culturas regionalas.
