L'OPLO lança lo recrutament dels premièrs ambaissadors de la lenga occitana dins los licèus de Novèla Aquitània e d'Occitània.
Sabètz que cada annada, mai de 15 000 escolans fan lor dintrada en occitan dins una classa bilingua o immersiva ? Al licèu, en 2021/2022, 64 establiments prepausan l’opcion occitan als escolans de las regions Novèla Aquitània e Occitània. Aqueles escolans, que presentaràn l’opcion occitan al bachelierat, rejonheràn dins qualquas annadas lo milion de personas que parlan occitan uèi. Mes per contunhar de conquistar locutors mai, una prioritat s’impausa : se fisar a las jovas generacions. Es l’objectiu de l’operacion « Liceans ambaissadors ».
L'occitan pels joves, amb los joves
Un apèl a candidatura es estat adreçat a l’ensemble dels licèus concernits dins las acadèmias de Bordèu, Limotges, Montpelhièr e Tolosa. Aquela mesa en malhum interacademica es renduda possibla per la posicion estrategica de l’OPLO. S’agís d’identificar de liceanas e de liceans, demest aquelas e aqueles qu’aprenon l’occitan, qu’acceptarián de devenir « ambaissadors de la lenga occitana » per aquesta annada escolara. Lor ròtle ? Anar al rencontre de lors camaradas per lor parlar de lor percors, aportar un espiar nòu sus la transmission de la lenga e prepausar un projècte comun de sensibilizacion a la lenga occitana. Un desenat de joves mai o mens seràn seleccionat/da.s e convidat/da.s a participar a mantuns escambis dins l’annada. Beneficiaràn d’un acompanhament personalizat e veiràn lor engatjament valorizat.
Candidaturas possiblas fins al 28 de novembre
Los/Las licean.a.s interessat/da.s pòdon postular sul siti de l’Ofici public de la lenga occitana fins al 28 de novembre. Los premièrs Ambaissadors de l’occitan al licèu seràn designats corrent decembre per una presa de foncion en debuta d’annada 2022. Aquela novèla iniciativa s’inscriu dins lo Plan d’accion licèu per l’occitan qu’a per tòca d’enraiar la baissa dels efectius inscrits en occitan al licèu.
