Encargat/ada de mission « lenga occitana »


APÈL A CANDIDATURAS

Encargat/ada de mission Ensenhament
pòste de categoria A

L’Ofici public de la lenga occitana es un Gropament d’Interès Public compausat de las Regions Novèla Aquitània e Occitània e de l’Estat (Ministèri de l’Educacion nacionala e Ministèri de la Cultura). Sa mission es dobla : s’agís al còp de definir e tanben de metre en òbra la politica linguistica publica en favor de la lenga occitana suls dos territòris concernits. Aquela politica pòrta en particular sus la transmission e l’usatge de l’occitan al prèp de las novèlas generacions. L’Ofici public de la lenga occitana recruta son encargat/da de mission Ensenhament.

Quadre d’emplec :

Agent de categoria A, professor titulari de la foncion publica d’Estat, mes a disposicion pel ministèri de l’Educacion nacionala, en conformitat amb lo decret nº2013-292 del 5 d’abril de 2013 relatiu al regime de dret public que s’aplica als personals dels gropaments d’interès public.
Aquel pòste es dobèrt als professors del primièr e del second gra, quinas que sián lors disciplinas, de las acadèmias de Bordèu, Limòtges, Montpelhièr, Peitius o Tolosa.

Missions principalas :

  • Participa a l’elaboracion e la mesa en òbra de la politica linguistica occitana, en particular sus la transmission e la practica de l’occitan en mitan escolar e peri-escolar ; jòga un ròtle d’ajuda a la decision d’aquela política ;
  • Seguís, jos l’autoritat del Director e en relacion ambe los partenaris publics, associatius e privats concernits, las accions destinadas als publics escolars e al còs ensenhant.

Activitats professionalas:

L’agent participa a la mesa en òbra dels objectius definits per convencion entre l’Estat e las Regions concernidas (article L.312-10 del còdi de l’educacion) e a un ròtle d’ajuda a la decision al prèp dels administrators del Gropament per desvolopar l’ensenhament de l’occitan e en occitan.

Dins aquel encastre, contribuís en particular :

  • A concebre, metre en òbra e evaluar las orientacions estrategicas pluriannualas de la politica d’estructuracion e de desvolopament de l’ofèrta d’ensenhament de l’occitan e de son acompanhament, en sosten dels servicis ministerials e academics de l’Educacion nacionala ;
  • A elaborar, metre en òbra, evaluar los dispositius d’acompanhament de l’ensenhament gerits per l’Ofici public de la lenga occitana (ex. Borsas Ensenhar, Escòla futura, sensibilizacion dels liceans…) o los partenariats ambe d’Institucions terças ligadas a l’educacion nacionala (universitats, Onisep..) ;
  • A seguir, en ligam ambe los servicis de l’Educacion nacionala, l’organizacion de l’ensenhament de l’occitan ;
  • A prepausar e gerir los projèctes ligats a l’ensenhament qu’apèlan de finançaments complementaris (programas europèus, fond DGESCO etc.) ;
  • A seguir los operators qu’intervenon dins lo domeni educatiu e a instruire lors demandas de subvencion ;
  • A reculhir las donadas del domeni de l’ensenhament dins l’encastre de l’observatòri de la lenga occitana ;

Relacions ierarquicas e foncionalas :

L’agent es plaçat jos l’autoritat del Director del Gropament e aurà de relacions foncionalas ambe las administracions de l’Estat (notadament ambe la DGESCO del ministèri de l’Educacion nacionala e ambe los servicis rectorals de las acadèmias de Bordèu, Lemòtges, Montpelhièr, Peitius e Tolosa) e de las Regions concernidas e mai ambe totes los autres partenaris exteriors en França e a l’estrangièr.

Perfil, competéncias :

De formacion universitària superiora (bac + 3), completada de realas qualitats d’organizacion, de gestion de projèctes e de capacitats de sintèsi e de proposicions estrategicas, avètz una bona coneissença del foncionament de l’Educacion nacionala e de sas prerogativas en matèria d’accion d’ensenhament de l’occitan. Vòstras qualitats relacionalas, indispensablas per aquel pòste, s’acompanhan d’una experiéncia confirmada dins la desmarcha de conduita de projèctes. Sètz disponible/a pels desplaçaments necessaris dins lo quadre de vòstra mission, ambe un luòc de trabalh a Tolosa. Avètz de competéncias en lenga occitana (nivèl C1 del Quadre Europèu Comun de Referéncia per las Lengas) e una bona coneissença de sa cultura.
Las vòstras competéncias plurilinguas seràn apreciadas, especialament en catalan, espanhòl, o mai italian.

Depaus de las candidaturas :

Lo depaus de las candidaturas es dobèrt fins al 10 d’octobre de 2018, per via postala (Madame la Présidente – Office public de la langue occitane – 22 Boulevard du Maréchal Juin – 31 406 Toulouse cedex 9) ambe acusat de recepcion e tanben per corric a l’adreça que seguís : contact@ofici-occitan.eu.

Lo dossièr de candidatura compren :

  • Un curriculum vitae ;
  • Una letra de motivacion en francés e en occitan ;
  • Una còpia de l’arrestat d’afectacion actuala del candidat.