Comunicat de premsa : revista Papagai & Plumalhon


Mai de 2018

Dins l’edicion nº1101 en data del 27 d’abril de la Setmana, la societat Vistedit apèla l’Ofici public de la lenga occitana a tornar sus sa decision de non pas mai li acordar cap d’ajuda en 2018 per l’edicion de las revistas pels mainatges Plumalhon e Papagai.

Aquela causida de l’Ofici es la resulta d’una decision partenariala dels membres de l’Ofici, dins la continuitat de las accions regionalas mesas en òbra al cors de las annadas passadas.

Foguèt faita après lo constat d’una manca de reactivitat de Vistedit en seguida de mantunas temptativas d’acompanhament prepausadas per las Regions d’abòrd puèi per l’Ofici public de la lenga occitana per sortir la societat de sas dificultats. En efièit, dempuèi mantunas annadas, las revistas Papagai e Plumalhon arriban pas a trobar lor public malgrat una aumentacion regulara del nombre de dròlles en capacitat de las legir. Notadament :

  • En 2012/2013: las Régions Aquitània e Miègjorn-Pirenèus financèron un estudi portat per l’Associacion nationala per la formacion e lo perfeccionament professionals dins los mestièrs de l’edicion (Asfored) ambe lo sosten de l’agéncia regionala d’Aquitània ECLA (Escrit Cimemà Libre Audiovisual). Aquel estudi se basèt notadament sus la percepcion d’utilizators de las revistas Papagai et Plumalhon (parents, regents…) sollicitats per l’ocasion, e permetèt l’elaboracion d’un diagnostic e de preconizacions sus l’ofèrta editoriala, l’accompanhament a la comercializacion… S’agissiá d’un acompanhament tecnic de cap a una necessària adaptacion als besonhs del lectorat, del format de las revistas e al desvolopament d’una vertadièra estrategia comerciala. Ça que la, pauques cambiaments foguèron constatats, e cap d’acompanhament poguèt pas èsser mes en plaça ;
  • En 2017, los servicis de l’Ofici e la Region Novèla-Aquitània tornèron préner contacte ambe Vistedit, en ligam e accòrd ambe la Region Occitània, per un acompanhament especific. Aquestes escambis devián servir a far un punt suls objectius de l’estructura e s’apuejavan en particular sus la definicion per Vistedit d’una estrategia de desvolopament. Conscient de la fragilitat e de la complexitat de la situation d’aqueste ostal d’edicion, l’Ofici l’orientèt de cap a un dispositiu public, lo Dispositiu Local d’Acompanhament (DLA), qu’acompanha d’estructuras sul desvolopament e la consolidacion de sas activitats. Per poder accompanhar al melhor Vistedit, l’Ofici integrèt lo Comitat territorial de Bearn del DLA en novembre passat, mas Vistedit aderiguèt de faiçon tardiva a aquel dispositiu.

Per aquelas rasons, après mantunes rencontres e al regard de la manca de coëréncia dels elements de prospectiva e de seguit commercial e financièrs fornits, es fait lo constat que las condicions necessàrias a una revitalizacion de Plumalhon e Papagai son pas presentas. Sus aquela basa, l’Ofici public de la lenga occitana, tot en s’apuejant sus d’elements objectius, a causit ara d’arrestar son acompanhament.

Precisam tanben que dempuèi 1995 data de sa creacion, La Setmana es totjorn estada publicada sens cap d’ajuda ni de las Regions, ni de l’Ofici public de la lenga occitana. Pr’aquò, se i deviá aver un impacte indirècte sus La Setmana, l’Ofici es prèst a estudiar de solucions alternativas, dins lo respècte del principe de l’independéncia de cap al poder politic de la premsa d’opinion e d’informacion.

Enfin, coma o sabètz, l’Ofici public de la lenga occitana es un establiment public pilotat per las Regions Novèla-Aquitània, Occitània e l’Estat. A per objècte de valorizar e de desvolopar d’otíls eficaçes de politica linguistica. L’Ofici public de la lenga occitana es actualament en fasa d’elaboracion de son plan d’accion. Après entretens de quadratge e establiment d’un estat dels luòc entamenat en novembre de 2017, organizarà una fasa intensiva de concertacion durant los meses de junh e julhet qu’arriban sus Bordèu, Lemòtges, Montpelhèr, Pau e Tolosa.

La question de la premsa escrita e mai generalament la dels medias es centrala dins aquela reflexion sus la definicion de la politica linguistica de desvolopament de l’occitan. Per aquò, de solucions alternativas relativament als periodics escrits seràn mesas a l’estudi ambe l’ensemble dels operators concernits per la lenga occitana.

L’Ofici public de la lenga occitana